Ermənistanın hərbi təcavüzü nəticəsində Azərbaycanın
20% ərazisi işğal edilmiş, bir milyona yaxın soydaşımız daimi yaşayış yerlərini
tərk edərək qaçqın və məcburi köçkün həyatı yaşamaq məcburiyyətində qalmışdır.
İşğal prosesi zamanı minlərlə soydaşımız qətlə yetirilmiş, xalqımıza qarşı
Xocalıda, Meşəlidə, Qaradağlıda, Ağdabanda, Başlıbeldə soyqırımı  hadisələri törədilmişdir. Eyni zamanda
yaşayış məntəqələrimiz dağıdılaraq xarabazarlığa çevrilmiş, milli və dini abidələrimiz
dağıdılaraq Azərbaycan izinin silinməsi istiqamətində əsil vandalizm həyata
keçirilmişdir. Yuxarıda sadalanan vəhşilik aktlarına baxmayaraq Azərbaycan dövləti
və xalqı hümanistlik göstərərək məsələnin beynəlxalq təşkilatların vasitəçiliyi
ilə qan tökülmədən, danışıqlar yolu ilə həll edilməsinə razılıq vermişdi. Lakin
ermənilər və onların havadarları Azərbaycanın məsələnin həllinə hümanist
yanaşmanı düzgün qiymətləndirməyərək bunu Azərbaycanın zəifliyi kimi dəyərləndirdilər
və danışıqlar prosesini imitasiya naminə davam etdirməyə üstünlük verdilər. 2003-cü ildə cənab İlham Əliyev Azərbaycan
Respublikasının Prezidenti seçildikdən dərhal sonra  bəyan etdi ki, biz danışıqlar xatirinə
danışıqlar aparmayacağıq. Cənab Prezident İlham Əliyev görəndə ki, nə Ermənistan,
nə də problemin həllində vasitəçi rolunda çıxış edən ATƏT-in Minsk qrupunun həmsədrləri
məsələnin həllini deyil, uzadılmasının tərəfdarı kimi çıxış edirlər, Azərbaycanın
işğal olunmuş ərazilərinə Suriya, Livan və digər dövlətlərdən erməniləri köçürərək
demoqrafik vəziyyəti dəyişməyə, Azərbaycan xalqını məğlubiyyətlə barışmağa
çalışırlar. Bundan sonra cənab Prezident açıq 
şəkildə məsələnin yeni həll variantını, hərbi – siyasi  həll yolunu bəyan etdi. Dövlətin bütün
resurslarını səfərbər edərək güclü iqtisadiyyat formalaşdıraraq Ordu
quruculuğuna xüsusi diqqət yetirdi və nəticədə müasir dövrün tələblərinə cavab
verən qüdrətli Ordu yaratdı. Formalaşdırılmış qüdrətli Azərbaycan Ordusuna
lazımi anda, uyğun şəraitdə irəli əmri verildi və cəmi 44 günlük Vətən müharibəsi
Ermənistan üzərində möhtəşəm Qələbə ilə başa çatdı. Ermənistan Ordusu
darmadağın edildi, Ermənistan kapituliyasiya  aktına imza atmağa məcbur oldu, Azərbaycanın ərazi
bütövlüyü təmin edildi və tarixi ədalət bərpa olundu. Azərbaycana yeni müharibə,
yeni torpaqlar iddiası ilə hədə-qorxu gələn Ermənistan ordusunun silahlarının
böyük bir hissəsi Azərbaycan Ordusu tərəfindən vurularaq məhv edildi, bir hissəsi
isə qənimət kimi ələ keçirildi. Cənab Prezident İlham Əliyev tərəfindən olduqca
müdrik qərar qəbul edilərək Ermənistan ordusundan ələ keçirilmiş hərbi
texnikalardan ibarət “Qənimətlər Parkı” yaradıldı. Bu parkın yaradılması olduqca mühüm siyasi əhəmiyyət kəsb
edir. Bu bir tərəfdən Ermənistanı əvəzsiz olaraq hərbi texnika ilə təmin edən
Rusiyaya, digər tərəfdən isə Ermənistan və dünya erməniliyinə mesaj idi.  Bu o demək idi ki, siz Ermənistanı
silahlandıraraq, hər tərəfli dəstək göstərərək Azərbaycanın ərazilərini əbədi
olaraq işğal altında saxlamaq istəyirdiniz. Amma bacarmadınız. Azərbaycan
Ordusu verdiyiniz silah – sursat və hərbi texnika ilə birlikdə Ermənistan
ordusunu məhv etdi, bir hissəsini isə qənimət olaraq ələ keçirdi.

2020-ci ilin dekabr ayının 10-da keçirilmiş
Hərbi Parad xalqımız və dövlətimiz üçün olduqca qürurverici hadisələrdən
biridir. Türkiyə Silahlı Qüvvələri ilə birlikdə Qalib Azərbaycan Silahlı Qüvvələrinin
Azadlıq Meydanında təşkil olunmuş Hərbi Paradı Azərbaycan Ordusunun qüdrətini
nümaiş etdirməklə yanaşı Azərbaycanla Türkiyənin bir millət iki dövlət
olmasının təsdiqi idi. Qeyd olunan Hərbi Paradı hər iki dövlət başçısının birgə
müşayət etmələri isə türk dünyasına düşmən olan qüvvələrə açıq mesaj idi.

Birliyimiz
qalibiyyətimizdir!

Qarabağ Azərbaycandır!
 

                   Vahid
Əliyev,

      YAP
Xocalı rayon təşkilatının sədri